मांगल्याची नित्य असू दे, जीवास रे ओढ,
जीवा शिवाचे मिलन होता, जीवन होते गोड !
मांगल्य हे काय असे रे, सांग जरा रे गुज ?
स्वरुपात तु अमृत आहे, नी व्यापक विश्र्वरुपात;
जाणून हे तू वर्तून पुन्हा नांदावे स्वरूपात!
जीव, जगत्, जगदीश्र्वराच्या ऐक्याचे प्राबल्य;
ध्यानी ठेवून कर तू कार्य हेच असे मांगल्य!
म्हणूनच म्हणतो, मांगल्याची नित्य असू दे, जीवास रे ओढ,
जीवा शिवाचे मिलन होता, जीवन होते गोड !
शिवास स्मरूनी जीव जे करतो, दैनंदिन व्यापार,
शिवास विसरूनी, हरवून बसतो, घडतो रे व्यभिचार!
ध्येयभ्रष्ट होणे रे म्हणजे करणे रे व्यभिचार,
ध्येयप्रेरणेने रे जगणे, म्हणजे शिष्टाचार!
म्हणूनच म्हणतो, मांगल्याची नित्य असू दे, जीवास रे ओढ,
जीवा शिवाचे मिलन होता, जीवन होते गोड !
No comments:
Post a Comment